Талдықорғанда апелляциялық сот жас әйел Айзат Жұманова өліміне қатысты резонансты іс бойынша түпкілікті шешім шығарды, деп хабарлайды Jarialike.kz Tengrinews.kz-ке сілтеме жасап.
Әңгіме Жетісу облысы Ақсу ауданы Баласаз ауылының 32 жастағы тұрғыны туралы болып отыр. Оны күйеуі өлімші етіп соққыға жыққан. Ер адам 14 жылға бас бостандығынан айырылғанымен, үкіммен қорғаушы мен айыптау тарапы келіспейтіндерін білдірген. 25 ақпанда марқұм Айзат Жұманованың күйеуі Айбар Жанболатқа қатысты үкім апелляциялық сотта қайта қаралды.
«Қылмыстық істер жөніндегі апелляциялық алқа шешімімен бірінші сатыдағы соттың үкімі өзгеріссіз қалдырылды, апелляциялық шағымдар қанағаттандырылмады», — деді Жетісу облыстық сотының баспасөз қызметінің жетекшісі Нұрсұлтан Орынбасаров.
Жәбірленуші тарап сотталған адамның жазасын қатаңдатуды талап етуді жалғастырып отыр. Жақын арада олар жоғары тұрған сот сатыларына жүгінбек.
«14 жыл бас бостандығынан айыру — айтарлықтай мерзім. Алайда біз, соның ішінде марқұм Айзаттың анасы, жасалған қылмыстың ауырлығына толық сай келетін неғұрлым қатаң жаза тағайындауды талап етеміз. Біздің ойымызша, істің барлық мән-жайына тиісті құқықтық баға берілмеді, сондықтан қабылданған шешімге одан әрі шағымдану құқығымызды пайдаланамыз», — деді жәбірленуші тараптың адвокаты Зарина Мейрембаева.
Адвокаттардың хабарлауынша, сот қылмыстық іс бойынша бапты қайта саралау мәселесі сотқа дейінгі тергеп-тексеру кезеңінде-ақ прокуратура тарапынан шешілуі тиіс екенін, өйткені бұл оның құзыретіне жататынын атап өткен. Сонымен қатар апелляциялық қарау барысында прокуратураның ұстанымы іс жүзінде үкімді өзгеріссіз қалдыруды сұраумен ғана шектелген.
Осыны ескере отырып, сот сотталған адамның адвокатының айыпты жеңіл жаза көздейтін бапқа қайта саралау туралы өтінішін де қанағаттандырмады.
Еске салайық, 2025 жылдың жазында ерлі-зайыптылар — Айбар Жанболат пен Айзат Жұманова арасында отбасылық жанжал болған. Соның салдарынан әйел ауыр жарақатпен ауруханаға жеткізіліп, кейін жансақтау бөлімінде қайтыс болды.
Сот отырысы барысында ауруханаға ауыр хәлде жеткізілген Айзат Жұманованың бейнежазбасы ұсынылды. Бастапқыда полиция Қылмыстық кодекстің 106-бабы 3-бөлігі («Абайсызда өлімге әкеп соққан денсаулыққа қасақана ауыр зиян келтіру») бойынша тергеу бастаған, алайда кейін күдіктінің әрекеті 99-баптың 1-бөлігі («Адам өлтіру») бойынша қайта сараланған.
Биыл 9 қаңтарда сот ер адамды Қылмыстық кодекстің 99-бабы 1-бөлігі бойынша кінәлі деп танып, орташа қауіпсіздік мекемесінде өтеумен 14 жылға бас бостандығынан айыру жазасын тағайындады.
