«Заң және тәртіп» идеологиясын іске асыру аясында елордалық прокуратура Полиция департаментімен және әкімдікпен бірлесіп №4 қалалық емханада медициналық қызметкерлер арасында нашақорлықтың алдын алу, еңбек заңнамасы нормаларын сақтау бойынша түсіндіру жұмыстарын жүргізді, деп хабарлайды Jarialike.kz елорда әкімдігінің ресми сайтына сілтеме жасап.
Жыл басынан бері елордада есірткінің заңсыз айналымына қатысты шамамен 288 қылмыстық іс қозғалды, сондай-ақ оларды сатумен айналысқан тұлғаларға қатысты 95-тен астам іс тіркелді. Заңсыз айналымнан шамамен 42 келі есірткі заттары тәркіленді.
Астана қаласы Полиция департаментінің Есірткі қылмысына қарсы іс-қимыл басқармасының бөлім басшысы Әлия Қибатқызының айтуынша, заңсыз әрекеттерге көбінесе жастар тартылады.
«Ерекше қауіпті синтетикалық есірткілер болып табылады, олар дерлік бірден физикалық тәуелділік тудырады. Оларды тарату жасырын жарнама мен интернет-ресурстар арқылы белсенді жүргізілуде», – деді ол.
Мамандардың мәліметінше, ұсталғандардың көбі өздерінің есірткі таратумен айналысып жүргенін де аңғармайды. Ал «курьер» деп аталатындардың «мансабы» әдетте екі айдан аспайды.
Тыйым салынған заттарды тарату үшін қылмыскерлер түрлі тәсілдерді қолданады: граффити жазуларын қалдырады, QR-кодтары бар билбордтар орналастырады, парақшалар таратады, мөрлер пайдаланады, сондай-ақ интернет-сайттар жасайды. Жыл басынан бері есірткі заттарын жарнамалайтын 488-ден астам интернет-ресурс анықталды.
Полицияда есірткі қылмыстары ауыр және аса ауыр қылмыстар санатына жататынын еске салды. Ол үшін қылмыстық жауапкершілік 14 жастан бастап туындайды.
Қазақстан Республикасы Қылмыстық кодексінің 297-бабына сәйкес, есірткі құралдарын, психотроптық заттарды және олардың баламаларын заңсыз сатып алу, сақтау, тасымалдау, өткізу мақсатында жөнелту немесе сату мүлкі тәркіленіп, бес жылдан сегіз жылға дейін бас бостандығынан айыру жазасымен жазаланады.
Тәртіп сақшылары егер тұрғындарға психоактивті заттарды сақтау немесе сату фактілері, сондай-ақ осы құқық бұзушылықтарға қатысы бар адамдар туралы ақпарат белгілі болса, бұл туралы Астана қаласы Полиция департаментінің Есірткі қылмысына қарсы іс-қимыл басқармасының анонимді сенім телефондарына хабарлауға болатынын еске салды.
Қоңыраулар тәулік бойы 71-63-93 және 102 нөмірлері бойынша қабылданады.
Сонымен қатар, спикерлер медициналық қызметкерлер күн сайын кәсіби міндеттерін жоғары қауіп жағдайында атқаратынын атап өтті. Олардың ішінде алкогольдік немесе есірткілік мас күйдегі науқастарға бару, сондай-ақ басқа да қауіпті жағдайлар кездеседі.
Медициналық қызметкерлердің қауіпсіздігін арттыру мақсатында жедел жәрдем қызметі деңгейінде заманауи бақылау және қорғау шаралары енгізілуде. Атап айтқанда, барлық бригадаларда аудиомониторинг енгізілген, ол жанжалдарды азайтуға, қарым-қатынас тәртібін арттыруға, дәлелдемелік базаны қамтамасыз етуге және медициналық қызметкерлердің құқықтық қорғалуын күшейтуге мүмкіндік береді.
Еске сала кетейік, Қазақстан Республикасының Қылмыстық кодексіне 380-3-бап енгізіліп, онда медициналық қызметкерлер мен жедел жәрдем жүргізушілеріне қызметтік міндеттерін атқару кезінде қорқыту және күш қолдану үшін жауапкершілік көзделген.
