Атырауда сот никаб киген қыздардың мұз айдынында арабша жазуы бар Қазақстан туымен суретке түсуін ұсақ бұзақылық деп санады. Бұл туралы Orda.kz-ке сілтеме жасап Jarialike.kz хабарлайды.
Құқық бұзушылардың кінәсі іс материалдарымен толық дәлелденді. Хаттама, рапорт, фотосурет және басқа да дәлелдемелер бар.
«Мұндай құқық бұзушылық үшін жаза мөлшері 20 АЕК көлемінде айыппұл салу немесе 5-тен 15 тәулікке дейін әкімшілік қамауға алу қарастырылған», – деп жауап берді Атырау қаласының әкімшілік құқық бұзушылықтар жөніндегі мамандандырылған соты.
Соттың қаулысына сәйкес, бір қызға ауырлататын мән-жайлар — кәмелетке толмағанды құқық бұзушылыққа тарту және оны топ болып жасау — ескеріліп, 15 тәулікке әкімшілік қамауға алу жазасы тағайындалды. Екінші қызға 78 640 теңге көлемінде айыппұл салынды. Ал үшінші кәмелетке толмаған қыздың заңды өкіліне 39 320 теңге айыппұл тағайындалды.
Суретте тағы бір қыз болған, бірақ, оның қандай жаза алғаны белгісіз. Сот қаулылары заңды күшіне енген жоқ.
Қыздардың әрекеті туралы ақпарат тарағаннан кейін Wildberries Қазақстан туын араб жазуларымен сатылымнан алып тастады.
