Желі қолданушылары бірнеше күннен бері 21 наурызға қараған түні Алматыдағы әл-Фараби даңғылында болған өлімге әкелген жол-көлік оқиғасын қызу талқылап жатыр, деп хабарлайды Jarialike.kz Tengrinews.kz-ке сілтеме жасап.
Еске салайық, қайғылы оқиға таңғы сағат шамамен 03:30-да болған. Батыс бағытта келе жатқан Zeekr электркөлігі жоғары жылдамдықпен қарсы жолаққа шығып кетіп, шығыс бағытта қозғалып келе жатқан Mercedes көлігімен соқтығысқан.
Mercedes көлігінің жүргізушісі мен екі жолаушысы (22 және 20 жастағы қыздар) оқиға орнында қаза тапты. Ал Zeekr жүргізушісі аман қалып, жарақаттарымен ауруханаға жеткізілді.
Қазір бар назар Zeekr жүргізушісінің жеке басына ауып отыр. Желі қолданушылары ресми органдар әзірге жауап бере алмай отырған сұрақтарды қоюда.
Мәселен, pilly_grimm есімді қолданушы Threads әлеуметтік желісінде қоғамды дүр сілкіндірген апат туралы былай деп жазады:
"Неліктен полиция «үнсіз»? Ресми түрде іс қозғалғаны белгілі. Бірақ әлеуметтік желілер дәуірінде құрғақ ақпарат әрқалай қабылданады. Есімі қайда? Қоғам Zeekr тізгінінде кім болғанын білгісі келеді. Алматыда мұндай көліктер көбіне «алтын жастармен» немесе ықпалды адамдармен байланыстырылып жатады.
Бейнежазба қайда? Әл-Фараби — қаладағы ең көп бақылаудағы әрі камералармен қамтылған жолдардың бірі. Мұнда «Сергек» камералары әр қадам сайын бар, бірақ соқтығыс сәтінің ресми видеосы әлі күнге дейін ашық қолжетімді емес.
Жүргізуші мас болды ма? Нақты жылдамдық қандай болған? Және бейнежазба «техникалық ақауға» байланысты жоғалып кетпей ме?
Бұл жол-көлік оқиғасы — құқық қорғау жүйесі үшін сынақ. Қоғамда «заң бәріне бірдей» деген талап күшейіп отыр. Адамдар істің жабық есік жағдайында емес, ашық сотта қаралуын талап етеді, өйткені кейде резонансты апаттар осылайша жабылып кетіп жатады..."
Ал тәуелсіз журналист Михаил Козачковтың мәліметінше, апат кезінде қытайлық Zeekr9X электркөлігінің тізгінінде Алматының жоғарғы бөлігінде тұратын 32 жастағы кәсіпкер болған. Оның компаниялары көлік саласында жұмыс істейді. Солардың бірі 2024 жылдың күзінен бері бюджетке 50 миллион теңгеден астам салық төлеген.
Куәгерлердің айтуынша, сол түні Zeekr9X басқа бір көлікпен жарысқа қатысқан.
Журналист апатқа кінәлі адам ақыры сот алдында жауап беріп, жаза алатынына сенім білдірді. «Меніңше, дәл 10 жыл бас бостандығынан айырылады», — деп болжады Козачков Қылмыстық кодекстің 345-бабы 4-бөлігіне сілтеме жасап.
