Иран әскери күштері АҚШ кемелерінің Ормуз бұғазына кіруіне тосқауыл қойғанын мәлімдеді. Бұл туралы Jarialike.kz Euronews порталына сілтеме жасап хабарлайды.
Мәліметтерге сәйкес, оқиға АҚШ президенті Дональд Трамп елдің әскери-теңіз күштері Ормуз бұғазы арқылы өтетін кемелерге ілесіп жүруді бастайтынын жариялағаннан кейін болған.
Иран тарапы бұл әрекетті өзінің ұлттық қауіпсіздігін қорғау шарасы ретінде бағалап отыр. Әскерилердің айтуынша, стратегиялық маңызы зор су жолына шетелдік әскери кемелердің кіруі аймақтағы тұрақтылыққа қауіп төндіруі мүмкін.
Ормуз бұғазы — әлемдік мұнай тасымалының негізгі бағыттарының бірі. Бұл аймақ арқылы күн сайын миллиондаған баррель мұнай өтеді, сондықтан ондағы кез келген шиеленіс жаһандық нарыққа әсер етуі ықтимал.
АҚШ тарапы әзірге бұл мәлімдемеге қатысты ресми түсініктеме берген жоқ. Сарапшылар бұл жағдай Таяу Шығыстағы геосаяси шиеленістің күшеюіне алып келуі мүмкін екенін айтады.
