Депутат екі жылда картадан неше елді мекеннің жойылғанын айтты

Inbusiness.kz ақпаратынша, Мәжілісте талқыланған шекаралық елді мекендердің мәселесінде алаңдатарлық статистикалық деректер жарияланды.
Жиында бірінші болып баяндама оқыған Мәжіліс депутаты Жигули Дайрабаев "ауыл халқының жылдан-жылға азайып бара жатқаны назар аударуға тұрарлық жайт" деді. 
– Бүгінде елімізде 6208 ауыл бар, ал 2023 жылы 6286 ауыл болды. Сонда тек 2 жыл ішінде 80 ауыл жойылды. Күні кеше ғана Мемлекет басшысы Үкіметтің кеңейтілген отырысындағы сөзінде ауылдық аймақтарды жан-жақты дамытуға арналған мемлекеттік қолдау шараларының бәрін бір бағдарламаға біріктіру қажеттігін баса айтқаны баршаңызға мәлім. Сондықтан, осы мәселені талқылап, ауылдарды соның ішінде шекара маңындағы ауылдарды дамыту бойынша нақты шешімдерге келген жөн, – деді Ж.Дайрабаев. 
Ұлттық экономика министрлігі соңғы он жылда Қазақстан картасынан 572 ауылдың жойылғанын хабарлаған еді.