Әуелде мәңгі, шексіз түнек торлаған,
Хаостан басқа ештеңе болмаған.
Тіршіліктің бастауы, әлемнің ұрығы
Сол Хаостың қойнауында орнаған.
Шексіз Хаос дүниеге әкелді
Әлемдерді, мәңгілік құдайларды.
Соның бірі – Жер-құдай Гея еді,
Нәр алып ғалам одан шырайланды
жарық аспан қаншалық қашық болса,
Тереңде, тұңғиықта Тартар туды.
Мәңгілік қараңғылық құрсауында
Шыңырауды естіпппең Тартар сынды.
Гея жалғыз емес еді ғаламда,
Тағы бір күш бой көрсеткен со маңда.
Хаостан тіршілікке тыныс берген
Махаббатиың құдайы Эрос жаралған
.
Әлемнің жаратылуы басталды. Шексіз Хаостан мәңгілік Түнек – Эреб пен қара түн – Нюкта дүниеге келді. Ал Түн мен Түнектің одағынан мәңгілік Жарық – Эфир және шуақты Күндіз – Гемера пайда болды. Жарық күллі әлемге таралып, түн мен күн бірін-бірі алмастыра бастады.
Құдіретті әрі мейірімді Жер-Ана шексіз көгілдір Аспанды – Уранды дүниеге әкелді. Аспан Жердің үстіне керіліп, көкжиекке дейін созылды. Жерден биік таулар бой көтеріп, мәңгілік гүрілдеп жататын ұлан-ғайыр Теңіз пайда болды.
Жер-Ана Аспанды да, Тауларды да, Теңізді де өзі жаратты. Олардың әкесі болған жоқ.
Аспан-Уран әлемнің билеушісіне айналды. Ол берекелі Жер-Ана – Геяны өзіне жар етіп алды. Уран мен Геядан алты ұл, алты қыз – айбарлы әрі қаһарлы титандар дүниеге келді.
Олардың ұлы, бүкіл Жерді шетсіз-шексіз өзен секілді айнала ағып жатқан титан Океан мен құдай ана Тефидадан теңізге құятын барлық өзендер және теңіз құдайлары – Океанидалар тарады.
Ал титан Гиперион мен Тейядан Күн – Гелиос, Ай – Селена және раушан саусақты Таң шапағы – Эос дүниеге келді. Астрей мен Эостан түнгі қара аспанда жарқыраған сансыз жұлдыздар мен төрт тараптың желдері тарады. Олар: долы мінезді солтүстік жел – Борей, шығыс желі – Эвр, ылғалды оңтүстік жел – Нот және мол жаңбырлы бұлттарды айдап әкелетін батыстың жұмсақ желі – Зефир еді.
Құдіретті Жер-Ана титандардан бөлек, маңдайында жалғыз көзі бар үш алып циклопты да дүниеге әкелді. Олар – Арг, Бронт және Стероп еді. Сондай-ақ әрқайсысының елу басы мен жүз қолы бар, таудай зәулім үш дәу – жүзқолтыларды (гекатонхейрлерді) туды. Олардың есімдері – Котт, Гиес және Бриарей болатын. Бұлардың алапат күшіне ешбір құдірет төтеп бере алмайтын, ал табиғи қуатының шегі жоқ еді.
Алайда Уран өз балаларынан, әсіресе осы алыптардан шошып, оларды жек көрді. Ол оларды жарық дүниеге шығармай, Жер-Ана Геяның терең қойнауындағы қара түнекке қамап тастады.