Ресей мен Қазақстан ІТ-компанияларының кооперациясы спутниктік интернет жобасын жылдамдатуы мүмкін, деп хабарлайды Jarialike.kz.
Ura.ru ақпарат агенттігінің жазуынша, бұл туралы Ресей Үкіметі аппаратының жетекшісі Дмитрий Григоренко мәлімдеген.
Григоренко жоба аясында 2030 жылға дейін Жердің төмен орбитасына 292 спутниктен тұратын топтаманы ұшыру көзделіп отырғанын айтқан. Бұл жүйе жер бетіндегі адамдарға қолжетімді және жылдам интернет таратуға мүмкіндік береді.
Қазірге дейін алты спутник ұшырылған. Сондықтан жобаның қарқынын үдету үшін оның құнын арзандату жолдары қарастырылып жатыр.
Ресей қаржы университетінің бизнес-информатика кафедрасының профессоры Борис Славин Қазақстанмен бірлескен жұмыс бұл жобаны тиімдірек етуі мүмкін деген пікір білдірген.
Қолжетімді интернетке арналған төмен орбиталық спутниктік жүйе 2030 жылға қарай 300-ге жуық аппараттан тұруы тиіс. Қазірге дейін алтауы ғана ұшырылды. Жобаны жиі іске қосу үшін оның бағасын арзандату қажет. Мұнда Қазақстанмен кооперация көмектесе алады, өйткені бұл салада екі елдің де тәжірибесі бар. Астананың цифрлық даму деңгейі жоғары, әрі мықты мамандар жетерлік. Қазақстан үкіметі бұл жобаға мүдделі болса, спутниктерді ұшыру әлдеқайда тиімді болар еді, - дейді ол.
Белгілі болғандай, ортақ спутниктік интернет жобасы 2030 жылға дейін толық жүзеге асады. Егер екі ел арасындағы ынтымақтастық арта түссе, бұл мерзім бұдан да ертерек орындалуы мүмкін.
