Алматы халықаралық әуежайында кепілге алынған қыз әлеуметтік желідегі жеке парақшасында өзінің құтқарушысымен түскен суретін жариялады. Бұл туралы Qaz365.kz-ке сілтеме жасап Jarialike.kz хабарлайды.
«Менің құтқарушым! Екінші рет дүниеге келгеніме Мұса ағам себепкер», – деп жазды ол суреттің астына.
Qaz365.kz тілшісі осы жағдайға байланысты бейбіт күннің батыры Мұса Әбдірайым хабарласып, пікірлескен.
Оқиға болғаннан кейін келесі күні қыздың әкесі маған қоңырау шалды. Ол маған осындай қауіпті жағдайда қызымды құтқарғаным үшін алғыс айтып, үйіне қонаққа шақырды. Мен өзім құтқарған қыздың жағдайын білуді өз міндетім деп санап, әкесінің шақыруын қабыл алдым. Мені жақсы қарсы алды, қазір Ботагөздің жағдайы жақсы, кішкентай қызы бар екен», - деді Мұса Әбдірайым.
Айта кетейік, 7 наурызда Алматы әуежайында белгісіз ер адам әйелді кепілге алмақ болып, пышақпен қорқытқан. Сол маңдағы бейтаныс адам қаскүнемді әңгімеге айналдыра отырып, сәті келгенде қолынан пышақты жұлып алған. Ол неліктен мұндай әрекетке барғаны әзірге белгісіз.
Одан кейін Президент Тоқаев Алматы әуежайында қылмыскердің суық қаруын тартып алып, ұстауға көмектескен Мұса Әбдірайымды «Ерлігі үшін» медалімен марапаттады.
