Әйгілі тұлға Бұқар жыраудың Далба тауының етегіндегі кесенесі тозып тұр. Бұл туралы Egemen Qazaqstan басылымының тілшісі Мұрат Қапанұлы жазды. Жыраудың мазарына арнайы барған журналист кесене орналасқан аумақ 30 жылдан бері жөндеу көрмегенін айтады.
«...Кесене басы мен айналасы көріктендіруді қажетсініп-ақ тұр. 350 шақырымдай қашықтықты басып өтіп, бабамыздың кесенесіне келгенде сұрқы қашқан аумақты көрдік. Барлығы көнеріп кеткен, жаңартуды қажет етеді. Кесененің орналасқан жері мен мұражай, шырақшылар үйі Қарағанды облысының аумағында... Сонау 1993 жылы Кернейден кесенеге дейін асфальтті грейдер салынған екен. Ұзындығы 70 шақырымдай жол апалардың құрақ көрпесіндей қырық жамау, ойқы-шойқы. Кейінгі 30 жылда күрделі жөндеудің бетін көрмегені байқалып-ақ тұр. Ал кесенеге Павлодар облысы жағынан, яғни Баянауыл тұсынан апаратын дала жолы тіпті сорақы. Небәрі 30 шақырымдық жолға жол таңдамайтын көліктің өзі бір сағаттан артық жүріп барады. Айналаның көбі сортаң, жаңбыр жауса, қарға адым жер жүрудің өзі мұң», - деп жазады М.Қапанұлы.
Журналиске сұхбат берген шырақшы Сәбит Мұхановтың айтуынша, жыраудың кесенесін көруге туристер Ресейден, еліміздің әр аймағынан келіп жатыр. Бірақ алыстан ат арытып келетіндер үшін қонақүй салынбаған.
Айта кетейік, жырау зиратының ел жадынан өшпеуіне Мәшһүр Жүсіп себеп болған. 1927 жылы ол қабірінің басына Баянауылдың гранит тасын қадап кеткен екен. Ал басына жазуы бар тақтайшаны алғаш орнатқан – Екінші дүниежүзілік соғыс ардагері, руханият жанашыры Нағи Ахметұлы. Өлкетанушы Қайриден Мұзафаровтың айтуынша, 1973 жылы темірге ойылып жазылған тақтайшада: «Бұл жерге сөз зергері Бұқар жырау Қалқаманұлы жерленген (1973 жыл)»,- деп жазылған.
1993 жылы тұрғызылған кесене қазақтың баскиіміне ұқсатылып жасалған. Бабамыз аңсап өткен үш жүздің бірлігін сипаттайтын пішінде тұрғызылған. Биіктігі 12 метрлік сәулет ғимараты мәрмәрдан өрілген. Сұрқы қашқан жырау кесенесі мемлекет тарапынан кешенді қамқорлықты қажет етеді. Қарағанды облыстық әкімдігі Бұқар жырау мазарының жай-күйін назарға алуға тиіс.
Фото: akwatoria.ru
