Әлемге кино өнерінің алып тұлғасы ретінде танылған Энтони Хопкинс енді композиторлық шығармашылығын көпшілікке ұсынбақ. 88 жастағы актер әйгілі Decca Classics лейблімен келісімшартқа қол қойып, алғашқы классикалық музыка альбомын шығаруға шешім қабылдады.
«Life Is a Dream» («Өмір – түс секілді») атты альбом 21 тамыз күні жарық көреді. Жинаққа Хопкинстің әр кезеңде жазған 12 музыкалық шығармасы енген. Солардың бірі – «Bracken Road» композициясы қазірдің өзінде тыңдарманға ұсынылды.
Энтони Хопкинстің айтуынша, музыка оның өнердегі ең алғашқы арманы болған.
«Музыка – менің ең алғашқы қалауым, ең алғашқы арманым еді. Мен өмір бойы музыка жаздым. Кейбір шығармаларым ондаған жылдар бойы менімен бірге өмір сүріп келеді. Мен оларға әлі күнге дейін қайта ораламын», – дейді актер.
Хопкинс кәсіби актерлік мансабы басталмай тұрып-ақ фортепианода ойнап, музыкалық шығармалар жаза бастаған. Алайда оның шығармалары осы уақытқа дейін толыққанды жеке альбом ретінде жарық көрмеген.
Бұл альбом – өнер иесінің алпыс жылдық шығармашылық ізденісінің қорытындысы ғана емес, адамның арманына жету үшін ешқашан кеш болмайтынын дәлелдейтін ерекше оқиға. 88 жасында жаңа белесті бағындырған Энтони Хопкинс өнердің уақытқа бағынбайтынын тағы бір мәрте көрсетті.
