Кино тарихында көрерменді де, сыншыларды да қатар мойындатқан режиссерлер аз. Солардың бірі – Стивен Спилберг. Көпшілік оны блокбастерлердің шебері ретінде таниды. Алайда оның шығармашылығы тек ойын-сауық киносының аясымен шектелмейді.
«Список Шиндлера» фильмі арқылы Спилберг Холокост қасіретін адам тағдыры арқылы бейнелеп, кино өнерінің ең биік үлгілерінің бірін ұсынды. Ал «Спасти рядового Райана» соғыстың шынайы келбетін көрсетіп, әскери драмалардың жаңа өлшемін қалыптастырды.
Режиссердің «Поймай меня, если сможешь», «Терминал», «Фабельманы» секілді фильмдері де адам табиғаты, арман, отбасы және өмір таңдауы жайлы терең ой қозғайды. Ал «Вестсайдская история» мюзиклі оның түрлі жанрларда бірдей биік деңгейде жұмыс істей алатын әмбебап режиссер екенін тағы бір мәрте дәлелдеді.
Кейбір кинотанушылар өнер тек азшылыққа түсінікті болуы керек деп есептейді. Алайда Спилбергтің шығармашылығы үлкен аудиторияға арналған фильмнің де жоғары өнер туындысына айнала алатынын көрсетеді. Оның фильмдері көрерменді қызықтырып қана қоймай, ойландырады, толғандырады және адамдық құндылықтарды қайта бағалауға шақырады.
Стивен Спилбергтің феномені де осында: ол киноны миллиондардың жүрегіне жеткізе отырып, оның көркемдік биігін сақтап қала білді.
