Қайтыс болған соң марқұмның желідегі парақшаларына не болады?

Kazinform тілшісі дүниеден өткен адамның әлеуметтік желідегі парақшаларын да жерлеуге болатыны туралы мәліметпен бөлісті.
Мәселен Facebook қосымшасында аккаунттарды мемориализациялау мүмкіндігі бар. Мемориализацияланған парақшаға «Еске алу» мәртебесі беріледі. Бұл туралы желідегі анықтамалық орталықтың «Еске алу мәртебесіндегі аккаунттар туралы» бөлімінде көрсетілген.
– Еске алу мәртебесіндегі аккаунт – бұл өмірден өткен адамның достары мен туыстары ол туралы естеліктерін бөлісе алатын орын. Мұндай профильде адамның атының қасында «Еске алу» деген белгі пайда болады. Қайтыс болған адамның бұрын жариялаған жазбалары Facebook-те сақталып, оларды қолданушы бастапқыда кімге көрсетуге рұқсат етсе, сол адамдар ғана көре алады, - делінген анықтамалықта.
Мұндай парақшалар «Сіз тануыңыз мүмкін» бөлімінде және туған күн ескертпелерінде көрсетілмейді. Сондай-ақ ол адамның атынан ешқандай тұлға әлеуметтік желіге кіре алмайды. Тіпті марқұм өзі сенім білдірген азаматтар болмаса, профильді өзгерту де мүмкін емес.
Дәл осындай мүмкіндік Instagram желісінде де қарастырылған.
– Егер сіз Instagram-да қайтыс болған адамға тиесілі аккаунтты көрсеңіз, бұл туралы бізге хабарлаңыз. Біз парақшаға «Еске алу» мәртебесін береміз. Егер сіз марқұмның жақын туысы болсаңыз, профильді өшіруге өтініш бере аласыз. Аккаунттарға «Еске алу» мәртебесін дәйекті сұраныс түскен соң ғана орнатамыз. Біз марқұмның достары мен туыстарының көңілін құлазытпау үшін парақшаларға мемориалдық мәртебе бермеуге тырысамыз. Сонымен қатар, қайтыс болған адамның жеке деректерін қорғау үшін қосымша қауіпсіздік шараларын қолданамыз. Мұндай аккаунтқа кіру үшін ешқандай деректер берілмейтінін ескертеміз. Басқа адамның парақшасына кіру біздің ережелерімізге қайшы, - дейді Instagram әкімшілігі.
Марқұмның профиліне мемориалдық мәртебе беру үшін оның өмірден озғанын дәлелдеу керек. Айта кетейік, 2021 жылы Instagram қолданушысы жалған некрологтың көмегімен дәл осы әлеуметтік желінің негізін қалаған Адам Моссеридің аккаунтын мемориализациялап тастаған еді. (https://screenrant.com/instagram-memorialization-scam-founder/) Одан бөлек дүниеден өткен адамның аккаунтын өшіруге де өтініш беруге болады. Ол үшін қайтыс болған қолданушының жақыны өзінің туыстық қатынасы барын дәлелдейтін құжатты, марқұмның туу туралы және қаза тапқанын растайтын куәлікті ұсынуы шарт.
Ал өзге платформаларда әзірге мұндай мүмкіндік қарастырылмаған.