Атырау мұнай өңдеу зауытының маңында кәріз суы ағып жатыр
Зауыттың өндірістік жүйелеріне қатысы жоқ көрінеді.
Kazinform ақпаратынша, Атырау мұнай өңдеу зауытының маңында кәріз суы ағып жатқанын облыстық экология департаментінің баспасөз қызметі растады. Дәл қазір облыстық экология департаментінің мамандары оқиға орнында тексеру жүргізуді бастады.
– Атырау мұнай өңдеу зауытының маңында шойын тұрбадан кәріз суы ағып жатыр. Бұл – «Атырау облысы Су Арнасы» КММ-нің кәріздік-сорап стансасына баратын құбыры. Қазір мекеме мамандары ақаудың салдарын анықтап, жою жұмысына кірісті, - деп хабарлады департаменттің баспасөз қызметі.
Осыған орай Атырау мұнай өңдеу зауытының баспасөз қызметі түсінік берді.
– Зауыттың экологтары мен экология департаментінің мамандары оқиға орнына дереу барып, тиісті тексеру жүргізді. Нәтижесінде қара түсті сұйықтықтың кәріз жүйесінен ағып жатқаны анықталды. Бұл ақау АМӨЗ-дің аумағында емес. Зауыттың өндірістік жүйелеріне қатысы жоқ. Кәсіпорын штаттық режимде жұмыс істеп тұр. Өндірістік процестер тұрақты жүріп жатыр, - деп мәлім етті зауыттың баспасөз қызметінен.
Ал «Атырау облысы Су Арнасы» КММ-нің баспасөз қызметінен мәлім еткендей, құбырдан шыққан ағынды суды сору басталған.
– Ақаудың алдын ала себебі кәріз желісінің бұзылуынан болуы мүмкін. Оның нақты себебі тексеруден соң белгілі болады, - деп хабарлады мекеменің баспасөз қызметі.