Жомарт кенішіндегі қайғылы оқиға: Әкімдік қаза болғандардың отбасыларына көмек көрсетеді
Ресми дерекке қарағанда, шахтада тау массасы құлаған.
Kazinform мәліметінше, Ұлытау облысының әкімдігі кен орнында қаза тапқан жұмысшылардың отбасылары мен жақындарына психологиялық және әлеуметтік тұрғыдан қажетті қолдаудың барлығын көрсетеді.
Қайғылы оқиғаға байланысты өңір басшысы Дастан Рыспеков көңіл айтты.
— Қайғылы оқиға баршамыздың жүрегімізге ауыр тиді. Бұл жағдай — бірнеше отбасы үшін орны толмайтын қаза. Қайтыс болған кеншілердің туған-туыстарына, жақындарына шын жүректен көңіл айтамын. Бұл қасірет баршамыз үшін оңайға соққан жоқ. Қаза тапқандардың отбасыларына қажетті көмек көрсету үшін барлық тиісті шара қабылданады, — делінген көңіл айту жеделхатында.
Осыған дейін Ұлытау облысындағы шахтада апат болып, 7 адам төтенше жағдайда қалғаны туралы жазылды.
Ресми дерекке қарағанда, шахтада тау массасы құлаған. Кейінірек «Жомарт» кенішінде жетінші жұмысшының денесі табылды.
ҚР Төтенше жағдайлар министрлігі баспасөз қызметінің хабарлауынша, қайтыс болған жеті жұмысшының денесі жоғарыға көтеріліп, сот-медициналық сараптама жүргізу үшін полиция қызметкерлеріне тапсырылды.