Әйелдер арасындағы Tour de France Femmes жарысында командалар арасында дау туындады. Бірнеше ұжым кейбір велошабандоздардың спорттық бюстгальтерінің ішіне арнайы төсемдер салып, кеуде пішінін әдейі үлкейту арқылы аэродинамикалық артықшылыққа ие болды деп мәлімдеді.
Мәселе алғаш рет нидерландтық WielerFlits басылымының жарияланымынан кейін көтерілді. Командалардың айтуынша, жекелей жарыстар кезінде кейбір спортшылардың дене пішіні кәдімгі кезеңдермен салыстырғанда айтарлықтай өзгерген. Сарапшылардың пікірінше, мұндай өзгеріс ауа ағынын тиімді бағыттап, кедергіні азайтуы мүмкін.
Аэродинамика саласының маманы Берт Блокеннің зерттеуіне сәйкес, дене пішінін жасанды өзгерту ауа кедергісін шамамен 3,6 пайызға дейін төмендетуі мүмкін. Бұл жекелей жарыстарда әр шақырым сайын уақыт ұтып, жалпы нәтижеге әсер етуі ықтимал. (The Times)
Халықаралық велосипедшілер одағының (UCI) ережесі бойынша спортшының дене пішінін өзгертіп, артықшылық беретін киім немесе қосымша элементтерді пайдалануға тыйым салынған. Осыған байланысты төрешілер жарыс алдында велосипедтермен қатар спортшылардың киімдерін де мұқият тексеретінін хабарлады.
Қазіргі уақытта ешбір спортшы ресми түрде ереже бұзды деп танылған жоқ. Әзірге бұл – командалардың шағымдары негізінде тексеріліп жатқан мәселе, ал UCI бақылауды күшейтіп, қосымша инспекция жүргізуге шешім қабылдады.
