Қазақстанның ең қымбат футболшысы белгілі болды: Дастан Сәтпаевтың трансферлік бағасы рекорд жаңартты
Transfermarkt порталы қазақстандық футболшылардың жаңартылған нарықтық бағасын жариялады. Тізімде 16 жастағы Дастан Сәтпаев көш бастап, ел футболының жаңа рекордын орнатты.
Transfermarkt порталы қазақстандық футболшылардың трансферлік құнын жаңартып, жаңа рейтингті жариялады. Жаңартылған тізімде алматылық «Қайраттың» шабуылшысы Дастан Сәтпаев Қазақстанның ең қымбат футболшысы атанды.
16 жастағы таланттың нарықтық құны 2,8 миллион еуроға дейін көтерілді. Бұл – қазақстандық футбол тарихындағы ең жоғары трансферлік баға.
Бұған дейін рекорд 2,5 миллион еуромен Бахтиер Зайнутдиновқа тиесілі болатын. Енді бұл көрсеткіш жаңарып, көш басына Сәтпаев шықты.
Жас шабуылшы соңғы айларда Қазақстан Премьер-лигасында тұрақты ойын көрсетіп, жастар құрамасы сапында да көзге түсті. Сонымен қатар, ол болашақта Англияның «Челси» клубына ауысуы тиіс футболшы ретінде халықаралық сарапшылардың назарын аударып келеді.
Мамандардың пікірінше, Сәтпаевтың нарықтық құнының өсуі оның тұрақты ойыны мен жоғары әлеуетінің нәтижесі. Егер қарқынын жоғалтпаса, бұл көрсеткіш алдағы уақытта тағы да өсуі мүмкін.